金球獎嘅30人候選名單，英超總共有七名球員入選，但曼聯雙星盧卡古同埋伊巴謙莫域就冇份，不過佢哋都有好消息傳出，比利時國家隊教練馬天尼斯透露，之前足踝受傷嘅盧卡古已經好番晒，相信可以喺周六英超大戰作客利物浦嘅「雙紅會」候命。
早已攞到世界盃決賽周入場券嘅比利時，喺上周六嗰場世盃外作客以4:3擊敗波斯尼亞，盧卡古冇隨隊到薩拉熱窩，留喺布魯塞爾養傷。馬天尼斯話：「盧卡古嘅狀態冇問題，我哋有同曼聯嘅醫療隊伍保持聯絡，我冇收到摩連奴嘅來電，盧卡古上次冇出係因為佢狀態未到百分百，𠵱家已經冇乜大問題。」
雖然伊巴同盧卡古一樣落選金球獎，但佢傷勢進度理想，仲有可能喺今年12月復出。36歲嘅伊巴喺四月因為右膝韌帶受傷而提早收咧，五月做手術之後恢復進度理想，佢嘅目標係喺今年12月2日曼聯作客阿仙奴嘅英超聯賽復出。
求驗客