今年嘅美酒佳餚巡禮喺26日至29日喺中環海濱公園空地舉行，葡萄美酒夜光杯，但因為警方安全建議，會鼓勵入場人士喺戶外品酒時唔好用玻璃杯，要用膠杯。不過，入場票除咗有膠杯，其實仲送玻璃酒杯㗎喎；主辦單位旅發局話玻璃杯可以當紀念品，而且為咗環保，會有職員協助回收膠杯。
如果參加者用送嘅玻璃杯，又或者自己帶玻璃杯品酒，咁又點呢？旅發局話會盡量勸喻，但點跟進就仲要諮詢警方。警方就回覆話活動期間會採適當跟進，確保主辦單位遵守臨時酒牌發牌條件，保障公眾安全。不過，八方喺蘭桂坊成日見啲人攞住酒杯企喺街吹水，唔通拉晒佢哋？
巡禮室內就奉旨用玻璃杯喇，例如品味館29號會有由洲際酒店4間餐廳一齊搞嘅盛宴，名菜包括烤銀鱈魚配腐皮、凍藍龍蝦、香芋奶凍伴紫薯等，分3節各130個名額，每位580元。