上午是紮洋樓遊艇妹仔的「紙紮佬」，晚上拉上鐵閘就變身獅王傳說，以一雙巧手紮出栩栩如生的醒獅頭。「日頭係為生活，夜晚係為夢想」。余英豪是本港碩果僅存的獅頭紮作人，父母開醫館，一心由他繼承衣缽，這個80後卻有醫師不做，寧願花3年時間全職做學徒，跟隨老師傅學紮獅頭，破釜沉舟，「我7年冇放過假，但可以做鍾意嘅嘢，就好值得」。
為追夢冇繼承父母醫館
紅磡曲街可謂小小的殯儀一條街。夜幕低垂，泊滿棺材車，余英豪的小店仍燈火通明，「地舖做埋門市，朝早上貨落貨又要聽電話賣嘢，做到手唔停；紮獅頭就要好靜好專心，一定要拉咗閘先做得」。紙紮舖是傳統行業，大多家庭式作業，豪哥以外姓人身份接手的老字號是做了三代的港產百年老店。
「我人生有3個伯樂，呢度個業主係第3個。」豪哥語帶感激說。早上他出入殯儀館，為死者紮作車仔和屋仔，為往生者圓未圓的夢；晚上回到小店，是他繼續尋夢的快樂時光。
「我細個已經唔係正常年輕人，人哋鍾意踢波打機，我淨係鍾意整獅頭」。接到定單做到凌晨3、4點，興之所至通宵直踩，「唔覺得辛苦，只因為熱愛」。父母開醫館，身為獨子是舞獅隊的當然成員，人人爭演獅王傳奇，仍是小學雞的余英豪卻拆開家中獅頭，研究結構。
中五畢業，因自小在醫館幫手，已是表列中醫，父母屬意繼承醫館，他卻做了逃兵。「正式跟老師傅學整獅頭係我夢想，難得有人肯教，係期待咗好多年嘅機會」。3年學師生涯無人工，原家住馬鞍山的他乾脆搬到西營盤唐樓與師傅同住，只靠到學校教舞獅手作賺點零用。
他不諱言對父母有虧欠：「老竇成50歲先生我，對我係幾縱容……畢業咗幾年，啲朋友開始有穩定工作，自己仲係閒閒散散，開始考慮將來生計問題」，去與留之間，他遇上另一伯樂。「佢問我有冇興趣做殯儀紮作，佢話整呢啲，至少搵到兩餐」。到底也是紮作，離夢想比較近，也可有穩定收入，幫補繼續追夢。
7年前他接手老字號，全身投入日接夜的「無休生活」。相識多年的女友也遷就他，放工「一齊整獅頭，當係拍拖」。明年一月結婚，難得做OL的未婚妻也愛傳統手作，成了他最親密的私人助手。
■記者呂麗嬋