內地唔少鐵路規劃發展神速，好似杭州地鐵咁，首條地鐵、即係港鐵有份營運嘅杭州地鐵一號綫2012年先通車，到今年全市地鐵已經有93公里長，根據規劃到2025年全市仲會有10條綫，長度增至逾420公里，相對香港用40年起200幾公里，杭州似乎發展得好快，難怪港鐵董事局都要去考察，身兼非執董嘅陳帆同劉怡翔兩位局長亦有隨行。
據知一行人參觀咗一號綫，仲好細心研究一號綫嘅路線圖，其間亦去到西湖附近嘅一號綫鳳起路站，呢個原來係杭州人流最多嘅轉車站之一，站內仲有好多新穎設施，兩位局長同港鐵主席馬時亨都有試玩，例如係影吓互動得意相。
其實港鐵今次係同杭州方面簽訂意向書，想喺杭州設立港鐵學院杭州分院。咁啱噚日原來係港鐵行政總裁梁國權嘅57歲生日，杭州市政府突然搞咗個神秘生日party，令到香港團友好驚喜，認真細心喎！