林鄭新政府上任至今，一直強調好重視年輕人嘅聲音，希望吸納更多年輕人加入政府，所以佢建議改組後嘅中央政策組公開招聘20至30位年輕人參與政策研究，如無意外施政報告都會交代詳情。原來有問責官員都關注，其實時下年輕人有冇興趣入熱廚房？近期就此不斷四出打探，睇吓呢份工有冇人吼？查實有冇人肯做，有時好實際，除咗個人興趣，人工同待遇好唔好，肯定係招聘廣告上最吸睛之處。
八方聽聞，呢批中策組合約制年輕人嘅人工可能分兩級，旨在吸引不同資歷嘅人加入林鄭大家庭。當然啦，如何界定年輕嘞喎，可能都惹起爭議，都要小心行事。施政報告同時着墨不少年輕人發展，例如將青年事務委員會升呢為青年發展委員會，由政務司司長揸旗等細節，唔知年輕人對林鄭嘅好感，會否因此而增加？