提起馮英倫，大家點解諗起CY而唔係舒淇？因為八方係講緊英倫而非德倫，前者係政助並唔係藝人，賞識佢嘅伯樂係前特首梁振英。雖則名叫英倫但好愛國，港大搞學生會時已經帶隊北上！
1983年出生嘅英倫（Allen）由梁班子過渡至新政府續任發展局政助。有個細佬嘅佢自小住喺香港首批居屋之一嘅何文田俊民苑（𠵱家仲住緊㗎），小學讀領島、中學讀迦密，由細到大讀書都自動波，「屋企人對我啲功課都唔使點理」。
佢直言堅鍾意讀書，「上堂抄notes抄到好厚」，中學特別like中國文學，文科嘅佢亦愛歷史同經濟。讀好書有乜秘訣？「我係打爛沙盆問到篤嗰隻，未讀通時係都要讀到通為止」，自詡記性差背嘢唔叻，好在仲識融會貫通。高瘦斯文型嘅佢唔係運動健將，中學搞過學生報同劇社嘅幕後工作，「但都粉墨登場過一次，演福音劇」。
未畢業就俾CY睇中
喺港大主修歷史政治，仲上莊做過國事學會，2004至2005年任學生會外務副會長，因為帶團破冰訪京交流成為當時「紅人」，因頻頻喺傳媒亮相獲時任行會召集人梁振英青睞，「佢話覺得呢個𡃁仔都有啲自己諗法，未畢業就搵我做助理，我未搵過工就做嘢咯」。
喺梁班子任職期間，佢小登科做老襯，Allen嘅太太原來係澳門人，佢有時都會港、澳兩邊走。羨唔羨慕太太成日獲澳門政府派錢？Allen不以為然，覺得派錢冇乜意義。
