電影《回到未來2》有唔少未來高科技產品，其中一款懸浮滑板就嚟成真喇！中大工程學院研發出一個自動懸浮驅動器，用近場聲學原理，以每秒21,000次嘅超聲波振動，將空氣固定成為0.1毫米厚嘅氣膜，令成個懸浮器浮起；仲可以改變振動方向，調整氣膜氣壓，令懸浮器橫向自由移動。橫向移動功能係同類型懸浮器之中全球首創！
帶領研發團隊嘅中文大學工程學院機械與自動化工程系助理教授郭平表示，比起傳統磁浮、氣浮技術懸浮器，今次嘅懸浮器操作寧靜、耗電量低，每部造價仲只需要500蚊，而且唔需要路軌，目前可以做到移動秒速2.5厘米，載重200克（約一部iPhone 6s重量），但耗電只係1.2W，理論上用電芯就夠！當研發團隊整到專用電路操控，就可以唔用電線供電，做到真正嘅獨立移動。郭教授仲話呀，期望3年內可以發展成載人器具喎，話唔定到時就可以一人一部懸浮滑板代步，今次真係「回到未來」喇！