特首林鄭月娥果然有新猷，新一份施政報告有啲新玩法，除咗縮短宣讀時間以及取消吹風會等等，措施上亦有別過往兩任特首，至少有啲煲呔同689唔肯做嘅建議，佢都肯一一吸收，例如以港鐵股息補貼車費及改革稅制推利得稅兩級制等，過往唔少政黨同團體都有提出過，但一直未有落實，直至女特首上場，先至有啲眉頭。
政商界近日都討論，如果係薯片叔勝出，上述政策會唔會出爐？冇一致結論，但就普遍認為，除咗林鄭自己有啲新思維，亦要多得前兩屆政府、即係曾俊華連任兩屆財爺嘅政府，幫佢儲定糧，皆因薯片叔同煲呔理念相近，奉行自由市場、積極不干預政策，亦唔會亂使庫房錢，情願儲定錢應付金融危機，庫房唔水浸就假。
減利得稅少收50億
至CY上場時，薯片叔繼續鎮住庫房，堅持慳住使，就算CY要派糖亦面對掣肘，結果係點？可能係益咗林鄭一上場就可以開水喉，例如減利得稅就令庫房至少少收50億，或者攞港鐵股息補貼車費都肯制。
當然啦，呢個除咗因為荷包夠厚，都涉及林鄭嘅新思維嘅，民建聯陳克勤就話林鄭冇財金系包袱，覺得庫房唔需要咁多錢，不論思維抑或社會訴求上，都肯使多啲，而且佢面對好大政治壓力，有啲建議唔做唔得。佢都認同「前人種樹，後人乘涼」，覺得前幾屆政府慳落咁多錢，先有條件派甜頭。若有金融風暴點算好？佢話以香港財政實力兼阿爺支持，一定頂得住！
李八方