巴塞隆拿近排左翼短缺，除咗重磅收購嘅奧士文尼迪比利早前重創，迪路菲奧同丹尼斯蘇亞雷斯近排亦都傷咗，因此有傳睇中咗曼聯嘅安東尼馬迪爾，希望一月引入對方同美斯及蘇亞雷斯配合。
馬迪爾今季已經為曼聯入咗五球，仲交出六個助攻，但係摩連奴始終信任拉舒福特多啲。好似最近五場，馬迪爾只係後備入替，總共得139分鐘嘅出場時間。成日打後備，似乎摩佬淨係想將佢留嚟打盃賽咁喎。
留返係曼聯，打翼又唔夠拉舒福特爭，打中鋒又冇可能取代狀態巔峰嘅盧卡古，而且仲有養緊傷嘅伊巴謙莫域，新年應該就復出，即係話馬迪爾喺紅魔始終淪為後備機會大。
走人係咪好選擇呢？巴塞會唔會拎住呢點打動到馬迪爾呢？不過要買到佢相信都唔平，因為曼聯前前後後，都喺佢身上用咗5,800萬鎊轉會費，家陣球星水漲船高，可能冇一億鎊都唔會放啊。