重啟政改暫時無望，唔代表政制及內地事務局可以hea住做，試問喺林鄭當政嘅年代，點可能蛇王兼揸流灘？咁政制局有乜做好？最為政治正確嘅當然係力推粵港澳大灣區，君不見局長聶德權上場後，已經先後到訪中山、珠海同深圳3個大灣區城市考察，為大灣區機遇做定功課。
又睇番吖，前特首梁振英攞住一帶一路做baby，林鄭轉攻大灣區亦好合理，噚日佢出席一個研討會致辭時對施政報告內容封嘴，卻對大灣區侃侃而談，除咗重申大灣區發展係今年3月份總理李克強提出嘅非常重要倡議，亦指香港喺大灣區中已發揮超級聯繫人作用，會繼續扮演呢個角色，並強調香港係重要嘅創新中心，更希望成為大灣區嘅創新中心，明言大灣區發展計劃係呢屆政府工作要點，聶局長似乎要走多幾轉嘞喎！