大概只有做過女記者、女編輯嘅媽咪，又係香港大學中文系才女嘅媽咪──即係左丁山舊鄰居陳惜姿，先至會咁留意女兒朗誦小五中文課文，先至會聽聽吓就發覺事有可疑，立即上網查證。陳惜姿此人寫中文稿件好多冇得頂，又具備好記者之好奇心與凡事求證態度，不同於普通媽咪，才會發覺、揭發啟思出版之「新編啟思中國語文第2版」五上第一冊內，有一篇課文，載於單元二：「生與死」主題，文章名為：「永遠記住：這一時刻」，課文內容講一位譚千秋老師在汶川地震（2008年）時捨身救學生之事，原來係「樣板戲」，內容不真實，於2010年已被內媒「南方都市報」踢爆。
啟思出版社幾有名，係牛津出版社（OUP）屬下公司，OUP出書素來嚴謹，享譽甚隆，點解呢次啟思小五課本會咁蝦碌，收入一篇假內容嘅標準內地樣板宣傳文章呢？OUP及啟思嘅編輯部門真係要嚴肅檢討，以免影響學校及家長對啟思課本嘅信心。
啟思對「明報」講，「輯錄造假文章時未悉爭議」，幾難令人相信！南方都市報早在7年前，2010年10月揭發沒有譚千秋老師救人一事，啟思查證事件時，點會忽略咗㗎？當然，所有小學課本都要教育局審核批准，先至准印刷發行，但教育局有無足夠有實學嘅人手去覆核課文內容，甚有疑問，最終責任都係落番出版社編輯身上嘅啫。
多得陳惜姿揭發，啟思答應出第3版時會抽起呢篇造假課文。但有一位退休校長梁紀昌就幾搞笑，居然對明報記者講（十月五日）：教科書有別於新聞報道，內容非真實問題不大……他舉例不少課文涉及寓言和神話故事，均沒有科學根據，卻能帶出道理，學校選擇教科書時……不太着重文章內容是否虛構。
呢位梁校長，好彩已經退咗休，唔會再在課室講課！佢偷換概念，以神話故事及寓言與歷史事實比較，簡直違心，為護航而護航。我哋細佬哥時讀安徒生童話，課餘讀封神榜、希臘神話，乃早知道內容虛構，但讀到三國演義，老師已立即講明，演義並非正史，不可全信，兩種讀本，分得清清楚楚，汶川地震係2008年之真事，點可以借假老師造假文章呀，仲要編入小學課本，混淆小童腦袋？啟思錯誤選入課文，還可說一時之失，呢位身為校長嘅梁紀昌為假內容課文辯解，則不知是何等教育理念了！