馬迷都知道，贏開的馬狀態有保證，所以操練都毋須太辣。但蔡約翰馬房上季最佳新馬獎得主「首映」，9月中勝出沙田直路賽後，不但例課無缺，剛周二（3日）更來一課泥地大閘，擺明要力谷狀態。此駒將於周三（11日）角逐谷草二班1000米，爭勝決心之大可見一斑。
現年才4歲的「首映」剛周二那課大閘在雷神莫雷拉胯下一放到底，末段雷神扣實冇騎過，取勝姿態輕鬆，可以話大把在手，戰鬥力明顯仍在不斷提升中。
蔡約翰咁積極催谷「首映」，看似今仗不容有失，其實可理解。「首映」出道以來最擅長係快活谷1000米，此程跑過4次得3冠1亞，亞軍之役僅頸位不敵「財神」，純因當時以3歲馬身份，讓年長嘅「財神」19磅，否則冇可能會輸。
如果「首映」本周三之戰贏唔到，下一次谷草二班1000米，最快都要等到2018年先有賽程，又難怪蔡約翰要狂操「首映」，實在爭勝機會真係一閃即逝。