隔咗13年，法比加斯終於承認當年係佢請咗曼聯領隊費格遜食顏面pizza，亦終於向費Sir道歉。
時間返到去2004年10月24日，阿仙奴作客以0:2輸畀曼聯，49場不敗紀錄告一段落，呢場比賽充滿味，完場之後兩隊球員更加喺球員通道發生衝突。混亂之間，有塊pizza掟中咗當時紅魔領隊費格遜塊面，有傳掟pizza嘅人係當年效力阿仙奴、依家踢緊車路士嘅法比加斯，雖然佢嘅隊友基昂喺2014年一次訪問中亦講過係法比仔掟，但始終冇人認頭，到咗13年後，法比仔終於喺《Sky》嘅節目《A League of Their Own》承認係佢做嘅。
喺節目度，當主持 James Corden 問法比仔可唔可以為大家解開謎團，係咪佢掟pizza嘅時候，佢答︰「Yes！」而且高舉雙手笑得好開心，不過法比仔依然話︰「基昂講大話，因為我見佢喺我前面，好似打緊人，所以佢根本乜都睇唔到。」法比仔講番當時情況話︰「忽然間，我聽到好嘈，我諗發生乜事呢？所以我拎住我塊pizza行出去睇吓，我見到蘇金寶、里奧費迪南、基昂……個個係度互相推撞，我都想加入又唔知點做，所以就咁掟咗出去，當我見到掟到邊個嘅時候，我唔係有心㗎。」
法比仔更加向住鏡頭向費格遜道歉︰「我要同費Sir道歉，我真係冇心㗎。」當列納問法比加斯掟中咗費格遜咩位置，法比仔冇出聲但就拍吓自己塊面嚟答佢。