盛傳將會代表建制派參加新東立法會補選嘅工聯會鄧家彪，喺7月時加入埋民建聯，似乎想用兩頂帽谷票，而佢噚日上午未隨工聯會到政總示威，反而改隨民建聯大隊請願，全程獲安排企喺正中，仲同盛傳代表建制參加九西立法會補選嘅民建聯鄭泳舜輪流發言。
鄧家彪活動後話以民建聯成員身份請願，已事先同工聯會溝通，大家「互相諒解」，話今次係民建聯同工聯會合作，「做一啲有共識嘅嘢」喎。
民主黨主席胡志偉噚日亦帶同一眾年輕黨員去到政府總部請願，其間突然「離隊」走入記者群，變身攝影師為黨友影相。
雖然影相時功架十足，但志偉話平日無乜研究攝影，今次變身純粹幫兄弟，「頭先有兄弟一直做攝影師，我梗係要幫佢影返」，最希望當然係兄弟搞得掂啲地區工作啦！