一個「殺」字，喺政圈掀起殺戮戰，相信上月底喺集會中語出驚人、表明對港獨人士必須要「殺」嘅屏山鄉事委員會主席曾樹和，未必估到何君堯附和指嘅「無赦」兩粒字，反而令佢哋兩位先被追殺。
外號「高佬和」嘅曾樹和喺事發後轉趨低調，未有再開腔回應，「笠水」期間，有市民發現佢入咗大澳噃，唔通貪嗰度人少啲，唔會咁易被發現？
讀者陳小姐向八方報料，話周六喺大澳遇上曾樹和，對方有兩個後生仔隨行，其間高佬和入咗一間賣鹹魚嘅舖頭同店員傾偈，亦有揀鹹魚，有店員則問佢招呼幾多人，似乎有宴客活動！雖然戴起眼鏡多咗文氣，但高佬和嘅坐姿（圖），依舊夠晒霸氣！