中秋節天氣不佳，中午時分，中環行雷閃電，十二點半過後出門行去九如坊大班樓，巧遇大雨，雖有大雨傘遮頭，仍然難免弄濕褲腳，心諗弊啦，約咗女賓架M食飯，佢會唔會搞到好狼狽呢？行上九如坊，路窄人多，有大雨之時，確係麻煩㗎！
點知去到，賓架M隨後駕臨，態甚輕鬆，問佢有冇俾雨淋濕身，賓架M唔好意思咁話：「司機車我嚟嘅！」咪係囉，左丁山人老糊塗，居然諗唔起人地早已升上係有司機接送嘅級數，真抵打。
賓架M話：「今日做銀行幾辛苦，我成日唔知幾時收工。我嘅退休同事緬懷三十年前做分行經理嗰陣，上午睇報紙，打電話搵人客傾偈，下午寫吓貸款報告，簽吓信件，未夠六點就起身放工。現在呀，我地淨係睇報告，填報表，寫報告都搞足一日呀。」
三十年前銀行係男上司世界，女高層少之又少，除咗恒生林太之外，其他銀行全部係男士掛帥。今日唔同晒咯，金管局叫銀行頭頭去開會，聽講係女多男少，乜唔係啫，匯豐大中華區總裁黃碧娟，渣打香港總裁禤惠儀，恒生行政總裁鄭慧敏皆是女強人。負責最賺錢當紅部門，兵家必爭之地嘅零售財富管理部門主管，又係女士天下，如UBS盧太，中銀香港龔太，恒生Margaret，匯豐Diana（兼香港區行政總裁），渣打銀行個人銀行業務三位主管，全是女將，老牌低調銀行上海商業銀行嘅零售銀行主管莊希等等，可說今天的銀行財富管理，皆在各位女強人手中！美國歐洲方面成日有投訴話女行政人員上唔到高位，實在應該來香港學習學習，研究吓香港女士為何在銀行界如此巴閉！
賓架M有佢自己見解：「三十年前銀行業務以大型貸款、工商企業借貸為主，幾適合男士傾deals及應酬打波場合。現在就係香港富起來，銀行存款多，好多客戶根本唔駛借錢，而係要尋求如何投資先至好，因此理財產品大行其道，女士就比較細心注意及細節詳情，做呢類產品策劃，又唔駛咁多打波應酬嘅，好適合女性，因此女賓架咪乘時而興囉。」聽落好有道理，此乃市場自行調節，毋須政府立例推行一啲政治正確嘅措施（例如強制要求董事會內女士佔硬性比例），自由競爭之下，男女同工同酬，在所必然，美國方面仍落後，實在令人奇怪。