葉楚航馬房9月13日用見習騎師潘明輝贏「紅星」開齋，之後頭馬都由洋將勝出，包括這天（8日）由雷神莫雷拉攻下第五場四班1400米的「紅駿之星」。呢匹本地拍賣馬一換人即打開今季勝門，單Win及組合獨贏A1分別派41及17元。
五歲馬「紅駿之星」出自本港馬匹拍賣會，身價320萬元，之前贏過兩次都是五班1400米，今季則已兩戰，均於韋達胯下落敗，呢鋪一換雷神，即在閘前被落飛黨狙擊變4.1倍次熱。
「紅駿之星」沿途居中輕鬆留力，藉2檔慳位及負118輕磅下，結果後上輕易再贏1400米一次，彈甩亞軍「安喜」1.75馬位，馬兒首勝四班賽，亦見證雷神同葉楚航季內首度合作建功。反觀同廐另一閘前落飛馬「漸信名駒」跑落表現麻麻，在潘明輝胯下跑尾四。
葉楚航說：「『紅駿之星』今場配莫雷拉有個故事，報名前他聯絡我表示預計今日有兩場冇馬跑，一是四班1200米(即第三場，結果雷神坐冷板)，另一場即今組四班1400米，我話會為『紅駿之星』報名，叫他考慮是否接受上陣，兩分鐘後雷神覆我電話，話肯騎『紅駿之星』，不久我接到韋達來電，向我索騎『紅駿之星』，但已被雷神捷足先登了。『紅駿之星』將來可向田草1600或谷草1650米進發。」
第五場賽果正過正菜，新勝馬「安喜」大熱跑第二，跟頭馬「紅駿之星」造就今午首開大熱Q，派彩僅77元。三、四名分別為「佳運來」及「雷霆導彈」，四重彩派9,407元。