因為支持加獨搞到俾唔少西班牙球迷炮轟嘅巴塞隆拿守將碧基，喺上周五代表狂牛正選上陣，雖然助球隊喺主場3:0大勝阿爾巴尼亞，鎖定明年世盃決賽周席位，但碧基喺主場慘被噓到爆。周一歐洲區世盃外G組煞科戰，西班牙會作客以色列，碧基都唔使怕有冇球迷山長水遠嚟柴佢台，因為佢拎咗黃牌要喺呢場波停賽。
累積兩黃下場停賽
支持加泰羅尼亞獨立嘅西班牙後衞碧基，近排真係慘，除咗成為西班牙公敵之外，亦有傳佢同女伴Shakira已經分咗手。碧基喺上星期五狂牛大勝阿爾巴尼亞嘅世界盃外圍賽中一掂波就有球迷係咁噓，當佢有失誤就噓得更加勁㖭！之不過雖然大部份球迷都狂噓碧基，現場仍然有球迷係支持呢位巴塞球星，有小球迷更加高舉「碧基係最好」嘅標語，仲話想要佢件波衫，碧基喺比賽到60分鐘被換出嘅時候，噓聲之中亦夾雜住掌聲，可以見到看台上有球迷為佢鼓掌。
狂牛炒三粒首名出線
由於碧基喺下半場初段領到黃牌，喺世盃外累積兩黃而要喺下一場停賽，所以星期一作客以色列嘅最後一場世盃外佢肯定冇份，隊友大衛施華同樣因為今場喺下半場領黃，累積黃牌亦冇份鬥以色列。
西班牙喺G組九戰八勝一和，得25分入35球只失三球鎖定首名，呢支2010年冠軍隊，由78年開始到明年俄羅斯決賽周，已經連續第11屆亮相世盃，計參賽次數只係比德國同巴西少。
文：求驗客