香港人口之中，女少男多，下一代生女者多，生男者少，呢個現象，實不知如何解釋，遺傳學專家唔知有冇研究呢個有趣現象呢？照普通常識，生男生女，各有百分之五十機率，點解香港近二十年來，總是生女機會大過百分之五十㗎？
左丁山唔識答案。十月三日睇到報紙有半版訃聞，歸天者積閏享壽九十有五歲，有四子四女，七孫男四孫女，即兩代人有十一男八女，都係男多女少；但到咗第四代，有一曾孫男，一曾孫女，就顯示到第三代年輕人（約30歲至40歲一代）或者不願早婚生子女咯。一段訃聞，當然只係一個獨特個案，不能作有意義的推論，不過香港富三代男孫遲婚，似已是常規。
以舊家風角度睇，一位成功發達人士，有四個仔，七個男孫，而只得一位曾孫男，自然難以滿足，要求七個孫男生多幾個曾孫男，乃人之常情；但從21世紀青年嘅角度嚟睇，屋企有錢，生活不愁，自己樂得逍遙到處旅行，增廣見聞，都唔知幾好，何必三十歲前就結婚生子，生活形式固定？爺孫之間，必有代溝，因觀念不同，如強求統一，即是要孫兒一輩服從，回歸傳統儒家理念。偏偏現在年輕學生不讀古文，更不讀四書，同佢地講儒家一套，都幾難聽得入耳，除非同佢地講：「民為貴、社稷次之，君為輕」啦。
活在今日香港社會，講儒家之溫柔敦厚，大可能係堅離地，講粗口就係貼地氣，唔信就到大埔墟街市熟食中心聽吓，中式茶點點心檔每日有阿叔阿伯雄據，飲一啖茶，講一句粗口，咬一啖叉燒包，講一句粗口，中文大學學生幾十年來有在大埔租房當宿舍住嘅習慣，如到熟食中心食早餐，想唔講埋一份粗口都難。上星期日在馬場會員席沙圈上面有兩個男士爭廂位坐，講粗口互罵之大聲，相信着得身光頸靚之紳士淑女會聽到耳仔痛，都無謂去干涉咯，否則惹來一身罵。左丁山讀書時，在中一C，中二B粗口講不停，升上中三A班之後，A班學生竟然斯文好多，左丁山講一句粗口，後排兩位女同學就輪流篤背脊，用到鉛筆尖㖭，冬天有厚學生褸保護，唔覺得痛，夏天只得一件薄恤衫，就痛到飛起，女同學還要講多一句：mind your language!真係多得佢地，左丁山之後極少講粗口，幾十年後，那位女同學成為××醫院總理，社交名媛，馬主太太，大家講起舊事，相視大笑。今日女生，會唔會咁惡？問一位老師，佢話：「有咁惡呀，男女生一同講粗口吖嘛！」