講咗差唔多大半年有多，總獎金高達1,000萬澳元（折合約6,111萬港元）的珠峰大賽（草地1200米），12匹短途佳駟同埋鞍上配搭終在剛周四（5日）塵埃落定，亦已落實下周六（14日）於澳洲蘭域馬場上演。
其實當地馬會已經聯同澳洲傳媒不斷鋪天蓋地咁宣傳，但一直搞咗好耐，遲遲都未公佈報名馬出賽名單，全因門檻極高，一匹馬嘅報名費就要高達60萬澳元（折合約366萬港元）。另一場極高獎金嘅凱旋門大賽（一級賽2400米），最後階段額外留位費都係只需俾12萬歐元（折合約110萬港元），試問邊個馬主會敢博，除非認為自己愛駒真係咁有實力。
結果，最終只得12匹澳洲馬肯定出賽，冇外隊肯嚟挑戰呢場全球最高獎金草地大賽，其中焦點就落咗係新鮮出爐一級賽摩亞錦標盟主「女王儲」，呢匹上屆金拖鞋得主以旋風姿態追過所有對手，贏得全場掌聲，將會夥拍白布朗出擊。若然成功於珠峰大賽摘冠，肯定成為澳洲短途馬之后。
另外，前香港馬「精彩鬥士」自轉戰澳洲越騎越有，13戰當中贏得6場，其中一場更係一級賽新市場讓賽（1200米），上仗亦喺二級賽奪冠，近況咁弗，珠峰大賽點會冇佢份，「精彩鬥士」將會配貝力斯迎戰。
最後，澳洲灰色神獸「尚多湖」雖然上仗走勢麻麻，但係冇喺珠峰大賽選擇避戰，仲搵艾道拿幫手衝擊，就睇吓邊匹馬可以成功登上呢座珠峰啦！
澳洲珠峰大賽陣容
馬匹 騎師
尚多湖 艾道拿
措手不及 安國倫
紅達時 麥維凱
調兵遺將 柏爾
清白無暇 布文
精彩鬥士 貝力斯
織女法力 韋紀力
猛攻 史賓沙
英利殊 薛恩
女王儲 白布朗
侯勝 勞愛德
洋荷花 郭立基
圖片來源：互聯網