余文樂同陳冠希前日齊齊有新聞，嗱嗱嗱，唔係因為14年前兩個因為爭女、爭獎事件而爆粗、撞膊事件，亦唔係早幾個月因為各自服裝品牌生意留言互寸嗰件事。
咁係咩呢？
余文樂同陳冠希兩個人前日不約而同分別晒恩愛，先有余文樂同女友王棠云喺大陸睇NBA中國賽，夫唱婦隨咁拎住愛隊波衫等拎球星簽名，又被網民影到王棠云成個頭挨落余文樂膊頭上面。至於陳冠希講番好久以前嘅「閃卡」事件，之後就讚埋秦舒培係真愛，兩個人起碼一齊，就係想令對方開心，有時間就諗下睇乜嘢戲，去邊度旅行玩咁。
除咗感情生活有得比拼，呢兩位潮童喺時裝上都叮噹馬頭，陳冠希有品牌CLOT，余文樂就先後有品牌CMSS同Madness咁。不過講歷史，CLOT喺04年就成立，CMSS同Madness分別出現喺2010年同2014年，究竟係陳冠希想搶閘起步先，定余文樂淡定讓賽呢？
不過有件事，肯定係陳冠希贏咗。就係傳宗接代喇，因為陳冠希同秦舒培已經有囡囡Alaia，余文樂只係放風話諗過結婚，但未有實際行動。