10月2日信報有一篇專論，甚為有趣。文章題目係「街市熟食中心作為方法」，作者鄒崇銘，係影子長策會成員。文章用大篇幅攻擊新古典經濟觀、芝加哥學派及海耶克，末段就以大埔墟街市熟食中心為例，講「香港民主規劃和城市管理的範式」。
左丁山知識淺薄，睇唔明作者講嘅海耶克、芝加哥學派與大埔墟街市熟食中心如何扯得上關係，於是叫十幾年來，每個星期六早上都在大埔墟街市買餸嘅沙田陳太讀一讀嗰篇專論。陳太睇完話「壹仔過往口號係不扮高深，只求傳真」，呢篇文就係前段扮高深，後段未必傳真。例如：「最令人感到意外的是，整個熟食中心的衞生環境奇佳，不同店舖的陳設皆井井有條，卻極少見到食環署官員巡查的身影。看來經過長年累月的磨合後，商戶之間已形成深厚的默契，抱着同舟共濟的心態，共同把共享空間管理妥當，給予顧客一個良好的總體印象，從而達致多方共贏的結果。這正是踏入『後地產霸權』時代，香港民主規劃和城市管理的範式，我們或可重新發現『擺上神枱』前的海耶克，這裏根本找不到『共同體的悲劇』的位置。」
陳太話：「熟食中心邊度係衞生環境奇佳呀，有兩三檔簡直衞生差到極，睇見就唔想食，整體而言，衞生環境比新加坡同類熟食檔還是差咗一兩皮。食環署其實規定每檔只有四張圓枱，椅子固定四張，唔郁得嘅，肥佬坐唔落，靠四張圓枱，檔主如何每月交三萬元租金？故此每檔都擺設輕巧四方枱及圓凳，有利多做生意。照計就唔得嘅，但勝在食環署人員隻眼開隻眼閉，多年來當睇唔見，於是大家先至搵到飯食，呢樣分明就係自由市場效用，如果食環署揸正嚟做，日日踢檔，唔准多擺幾張枱嘅話，大埔墟街市熟食中心幾難生存。鄒先生所講嘅『共同把共享空間管理妥當』，我睇就係一個自由市場自動調節，各食檔自利均衡嘅結果，芝加哥學派好似係講呢樣嘢嘅噃，唔係咩？」陳太讀過經濟學，好似唔儍得晒，大埔墟街市可能係全新界最好生意嘅街市，啲食材一啲都唔平，過千蚊一條野生海魚，經常有供應，上等靚牛肉更是隨處可見，勝過沙田嘅街市多多聲，可與九龍城街市鬥一鬥，每逢星期六早上各款名貴汽車排隊等住入停車場，熟食中心內之若干檔主，早已搵到夠，可以放假唔做，去南極旅行㖭。常言道，藏富於民，大埔墟街市熟食中心就係表面證據，其要害之處，就係食環署收完租金就撒手不管，令市場自由運作，生意效果奇佳。