練馬師沈集成今朝（6日）好積極，找來兩位好手雷神莫雷拉及炒飯哥羅理雅，在機坪傾個不停，似在討論搏殺大計。
不過，周日（8日）沙田賽事，羅理雅並無替沈集成效力。咁究竟上述三人有乜共同話題呢？睇番資料，第一場四班1000米沈集成之「永旺喜喜」，今季3歲開始出道，先後由羅理雅及雷神共跑過兩場，結果均大熱落第，睇嚟騎練們都唔多順氣，莫非今朝三人正係研究點樣可以收服呢匹馬？
其實「永旺喜喜」上仗表現唔算太差，於谷草1000米排12檔堪稱死位，全程大外叠追趕前領馬，形勢劣得無可再劣，咁嘅情況下最終只輸3馬位跑第六，根本已反映質素甚佳。
雷神不放手今仗繼續騎，更加初戴頭罩上陣有誠意，看來沈集成必力求突破，以一洗同主馬「永旺年年」上月遠征韓國大敗之悶氣。