「以我認識嘅Rex，佢其實唔係好忍得痛。不過好在佢一上到擂台，就會係一個好強意志嘅人，佢真係靠住個意志，亦都好似佢咁講，佢感受到現場觀眾幫佢打氣嘅時候，就可以忘記個痛。」
擂台上同對手搏拳嘅只有曹星如一個，但其實背後仲有好多人同佢一齊打每一場。喺「星團隊」擔任物理治療師嘅Joe由2014年開始同Rex合作：「嗰時好似係12或者13連勝，佢比賽有咩傷患，我都負責處理。」擂台上嘅Rex夠晒兇狠，就算畀人打到鼻都爆埋，依然唔放棄，不過Joe就大爆Rex原來好怕痛：「治療嘅時候，佢都會嗌到飛起，都唔係好頂得順個痛，哈哈！」
除咗Joe，Rex嘅前按摩師Alan都有分享佢哋嘅趣事：「佢一比賽，就會自動變咗兇狠mode，平時台下就係個好得意嘅人。」此外Alan仲大讚Rex好聽話：「有一次佢有一個位受傷，咁我叫佢做一個好小嘅動作，就係每日咁捽一捽佢，過咗個禮拜之後就話番畀我聽佢每日都有捽之餘，一唔洗夾餸，一放低筷子嗰一刻就會捽住。」雖然呢件只係小事，但從呢件小事，已經反映到曹星如對拳擊嘅認真！
記者：植詠珊(Cathy)
剪接﹑編審﹑導演：Roy Leung@天馬座
攝影：廖達燊﹑Kaman