【跑馬地】現年35歲的余文樂去年底與台灣「皮帶大王」 王東生的索千金王棠云（Sarah）撻着，二人拍拖後首個中秋節繼續做連體嬰，「人肉速遞」來港的Sarah大前晚與樂仔到跑馬地按摩店鬆一鬆，嘆足兩小時才離開。
樂仔與女友在店外跟友人吹水，然後樂仔過馬路取回其百萬Benz Jeep接載女友。其間樂仔發現記者，笑着打招呼講「中秋節快樂」，但問到他中秋夜如何慶祝，他就封嘴急急上車，他在車廂與女友密密傾及冧爆互望，開車時更與記者揮手說再見，心情靚爆。
挨實睇NBA
前日樂仔就帶Sarah到深圳睇NBA中國賽的勇士對木狼，同場還有內地籃球明星易建聯，以及衛詩雅等。眾人坐第一行睇波，樂仔入場時更拖實Sarah，不再避忌公開戀情，二人更獲大會的kiss cam攝入鏡頭，不過二人不似一般情侶跟着錫錫，反而怕醜擰轉面。不過鏡頭以外，有球迷影到Sarah小鳥依人伏在樂仔膊頭上，樂仔亦十分受落，嘟嘴拿手機與女友及易建聯等人自拍。相信Sarah是勇士隊K湯臣（Klay Thompson）的粉絲，見她手中已準備波衫索簽名。
採訪、攝影：黃曉程、羅德光