馬圈都有雪中送炭！
長駐香港的法國45歲老將杜利萊國慶日完全冇座騎，今晚（5日）谷草亦只一駒上陣，僅策第五場三班1200米方嘉柏馬房的「同進」，結果杜利萊冇令方嘉柏失望，大熱門順利掄元，單Win及組合獨贏A1分別派31及19元。
「同進」季內第二次出賽，初配杜利萊，藉2檔沿途守第三位，形勢大利下輕勝半馬位，這匹身價350萬的香港拍賣馬，本身累積三捷全是谷草1200米。而杜利萊苦戰至今季第10次賽事終於開齋，亦令已贏今晚第三場「進綵」(騎師潘頓)的方嘉柏起孖而回，可謂皆大歡喜。
講番杜利萊，佢係現時香港次老外籍騎師，細最老洋將韋達約莫半年，至此所有現役在港洋將，季內都已勝出頭馬。杜利萊表示自己已老了，香港現在有很多後生騎師，長江後浪推前浪，他說自己是上一代騎師，原本今晚沒有馬騎，非常感謝方嘉柏臨時提供一駒。杜利萊又表示現時很難搵馬騎，支持越來越少，至於會否退下來，他表示暫時會專心騎好今季，之後才作打算。
第五場係熱門兼落飛馬天下，二至四名分別為綠燈馬「索先生」、半冷門「光芒再現」及啡燈馬「你知我意」，四重彩派近一萬三千元。