有兩席出缺嘅中西區區議會補選下月26日投票，其實提名期喺周二已經開始，但一直乏人問津，直至今日終於有人去馬。
民主黨地區小花伍凱欣今午會報名參加東華選區補選，前主席劉慧卿同現主席胡志偉都會到場，報名前喺小型誓師會為佢打氣。呢區原議員民建聯蕭嘉怡早前加入林鄭班子做政助，中途辭任，伍凱欣希望成功搶灘，為民主派攞番此席，皆因蕭當選前，呢區議員係民主黨何俊麒，伍凱欣話會盡力做好本份，報名前夕心情難免有少少緊張，但對過往嘅地區服務好有信心，唔少街坊仲睇住佢大。
盛傳另有民主派人士落場，伍凱欣強調，相信選民自己會做決定，總之唔會同陣營互相抽擊，而盛傳會代建制出戰嘅呂錦強校長呢，佢就話至今仲未撞見過對方開街站噃。