當人人喺中秋佳節，趕住提早收工同屋企人食飯慶團圓，自由黨嘅楊哲安（Jeremy）一家人嘅過節活動，認真特別！唔係齊齊去酒家切月餅，又或者去維園逼爆玩燈籠，而係拉隊去咗麥當勞……道，三代同堂企喺度。莫非嗰度賞嘅月，月亮圓啲又靚啲？但又唔見佢哋頭岳岳喎，反而齊齊向路過嘅車揮手，一家大細齊齊整整，同山頂居民say hello。
咁又係，下月26日，中西區議會山頂同東華選區都舉行補選，Jeremy積極考慮出戰山頂，身為前立法會議員嘅爸爸楊孝華同太太張新悅瞓身支持，難怪總動員幫拖，一家人認真warm，佢Daddy仲將呢張溫馨三代同堂相，轉發朋友祝福中秋愉快！。Jeremy最後單拖企至夜深，見大部份居民似乎已經回家，先至收埋易拉架離開，連佢自己都話，今個中秋夜，非常難忘。