前日中秋節個個歸心似箭，想同家人食飯做節，新民黨主席葉劉淑儀就喺呢個節日，帶住新愛將、即係該黨政策總裁袁彌昌，同以前喺保安局跟過佢、現已升呢為發展局局長嘅黃偉綸舊愛將會面。
葉劉帶住「新歡」踩場，「舊愛」黃偉綸冇乜葡萄味，仲好大方搵埋副局長廖振新及常秘（規劃及地政）甯漢豪等陪同接見。
此行其實傾啲乜？主要係土地問題，包括新界東北發展嘅賠償方案啦，葉劉反映咗受影響嘅古洞北同粉嶺北居民不滿政府嘅百和路方案等，同時亦傾咗善用空置工廈一事，例如係咪可以改裝作社區房屋或者畀文藝團體租用？「豪宅劏房」一事，葉劉亦好上心，佢引述黃偉綸話呢啲「豪宅劏房」喺規劃同結構上未發現問題，而政府各部門正從採光、地契條款等研究有冇違法。