咁至叫雷神嘛！主角莫雷拉知恥近乎勇，這晚（5日）於谷草一開局即贏孖寶，個人頭場勝出鄭俊偉馬房「荷蘭風車」後再下一城，於第二場四班1200米贏蘇偉賢馬房「友享友賞」，火速起孖領先騎師王。四歲馬「友享友賞」順利開齋，單Win及組合獨贏A1分別派37.5及18元。
雷神近排原本諸事不順，半個月內只贏兩場，遠征澳洲又食白果，仲要俾馬會CEO詐型暗示佢外地出賽太多。今晚佢大打爭氣波，並以行動證明自己於第二場冇揀錯馬，須知「自動波」上次跑第五，雷神因拉士冇騎盡爭取第四名，被罰停賽兩日，呢次佢棄騎此駒，寧願續策上仗由自己在田草1000米做阿二的「友享友賞」。
結果「友享友賞」首次渡江抽到黃金1檔，是3.7倍次熱，呢場由起步到衝線都係最快一駒，就此以一馬位之先，輕輕鬆鬆打開服役勝門，4歲馬季內兩戰1冠1亞，進步明顯。
蘇偉賢亦指上季3歲跑兩場冇表現的「友享友賞」今季有進步，感謝馬主願意付出時間和耐性，讓馬匹自然成長，馬兒將來可向快活谷及沙田雙線發展，路程長一點也可應付。
今場二至四名分別是「指揮官」、「及時行樂」及「星光大師」，四重彩派11萬幾。值得留意快活谷短途1、2檔馬Ｑ通常冷極有個譜，但今場1檔「友享友賞」3.7倍Win行頭，搭2檔「指揮官」(獨贏53倍)Ｑ卻冷至1,041元。