快活谷於這天（5日）星期四中秋節翌日公眾假期跑夜馬，近期成績低沉的雷神莫雷拉一洗頹風先拔頭籌，夥拍鄭俊偉馬房「荷蘭風車」，勝出第一場五班1650米，單Win及組合獨贏A1分別派67及25.5元。
雷神對上5次受注的本地及澳洲越洋賽，只贏過兩Win咁大把，又因未力策「自動波」到底，令該駒喪失第四名。惹來馬會CEO應家柏黑面暗批，指雷神是香港馬會聘請的「馬會騎師」，應該以香港為先，飛得太頻密往來其他地方出賽，會影響運動員體力。
果然經過高層訓示，雷神即打醒十二分精神，今場發揮小心翼翼，克服9檔沿途將「荷蘭風車」守於第五位靚位，直路發力時間準確，後上贏0.75馬位，為這匹5歲愛爾蘭馬，打開今季勝門。
鄭俊偉連同今仗季內有5Win，多達4場由雷神經手。鄭俊偉表示雷神即係雷神，可以從外檔移入靚位，走位一絕無人能及。而「荷蘭風車」在五班有利，歐洲馬比較襟跑且5歲仍算後生，不過下場升上四班可能失去優勢。
今場第二至四名順序「通勝」、「豐盛人生」及「金武士」，四重彩派97,163元。