特首林鄭下星期三會發表上任後首份施政報告，唔少新猷近期陸續曝光，包括有傳政府會撥出一定比例嘅港鐵股息作為恒常交通費補助，主力協助基層。嘩，有交通費補助喎，人人都拍爛手掌啦，身為立法會鐵路事宜小組委員會主席嘅田北辰就建議基層市民可以兩蚊搭車。
田二少喺電台節目講，可以為基層市民設立特別八達通，等佢哋可以用兩蚊搭車，以此代替𠵱家嘅600蚊交通津貼，但當然唔係全天候無限任搭，二少話可以限制每日只可以用優惠3次，避免濫用，仲話補貼新方案應該分成「三級制」，令全民受惠，長途客所獲折扣應更多。
問到基層如果要申請特別八達通，怕唔怕被標籤？二少話方法可行，因八通達一式一樣，好多人唔會識分，相信冇問題。