美國航空母艦列根號正在香港訪問，撞啱噚日係中秋節，列根號上面嘅官兵同香港人一齊過節，除咗去小學探訪，同小學生一齊做紙燈籠、食月餅外，官兵仲拍咗條片向香港人祝賀中秋節快樂，入面仲有幾個官兵用相當純正廣東話向香港人問好，八方估佢哋隨時係香港人。
列根號同隨行訪港嘅驅逐艦查菲號上面300幾個官兵，按傳統會上岸去不同地方做社區活動，噚日十幾個官兵同埋美國駐港總領事唐偉康，就去咗跑馬地寶覺小學探訪，除咗分享喺艦上生活嘅故事，佢哋同學生組隊玩掟波，仲玩得好投入。
廣東話問候港人
之後官兵又分組同學生一齊做卡通燈籠，班官兵以前未做過呢種中秋燈籠，佢哋都覺得好有趣，仲同學生一齊用膠水同畫筆為燈籠加上裝飾，最後班美軍軍官同班小學生一齊食點心，當然唔少得應節嘅月餅。
其實呢班美軍軍官都知道噚日係中秋節，一早計劃噚晚去睇舞火龍，又知道中秋係中國傳統入面象徵一家團聚，好受中國人重視嘅節日。
列根號官兵特別拍咗一條片，祝賀港人中秋節快樂，入面仲有幾個男女官兵，用相當純正廣東話向香港人問好，完全唔似係嗰種土生華人講廣東話風格，所以八方不禁懷疑，佢哋有可能係香港移民，又或者父母係香港移民，平日都有講廣東話，如果唔係點會講得咁好？
李八方
