上集《仙遊首爾》搵埋繙譯Regine同的士大佬吹水,今集繼續吹,講吓當年今日,原來韓國電影《逆權司機》某啲場面,今日都仲有發生!
影帝宋康昊喺戲中飾演一名的士司機金四福,喺佢載德國記者去光州途中,曾經開窗向途人大嗌問路,有的士司機話,「以前無GPS,真係咁做㗎!」揸咗的士40幾年嘅金司機話,以前無咁多高樓大廈,就記得晒啲路,「客人上車話去乜乜洞,就去,而家知道係乜乜洞,都唔知係邊橦大廈,所以咪要用GPS囉!」
對於的士司機嚟講,唔識路係小問題,收唔到錢先大件事!戲中金四福發現光州畀軍人封鎖,想話收錢返首爾,點知德國記者話:「No 光州,No Money!」80歲嘅金司機話以前成日發生呢啲事,「去長途嘅話,要同客人傾好,仲要收咗錢先,點解呀?你去到咁遠先話無錢喎,去報警呀?警察都收唔到錢,所以唔收錢先,唔去㗎!」
戲中金四福喺的士飯堂偷聽到,有外國人肯用10萬韓圜包的士一日,嗱嗱聲去搶單生意。所謂嘅的士飯堂,意思係方便泊車,司機集中去嘅餐廳。金司機話o依家都仲有的士飯堂,會同其他司機一齊食飯,佢哋多數會食辣炒豬肉、拌飯、燉乾明太魚、雪濃湯等。
電影以80年代為背景,見到當時嘅的士司機要着制服,金司機話o依家自由好多,不過短袖衫同短褲都係唔得㗎。今年亦有消息指,首爾市想的士司機着返制服,提高形象。
金司機話韓國的士分三類,個人的士、公司的士同模範的士。而戲中的士嘅車身同車頂都寫住「개인」,就係「個人」的士,部車係司機自己買嘅。喺韓國買架的士要1億韓圜,兌返約70萬港紙。公司的士即係出租車,分兩更,每更12小時,通常下晝五點至七點交更。模範的士就要求司機20年都無出過交通意外先揸得,保你安全,車費就最貴,多數夜晚先出嚟載醉酒客。
《仙遊首爾》重溫:
http://hk.apple.nextmedia.com/enews/animation/kfans/
記者:阿仙
繙譯:Regine
攝影:峰
編審:Kaman