落選特首後仍然動作多多嘅薯片叔曾俊華，趁住噚日中秋節又放片上網。喺段片入面，薯片叔話呢幾個月嚟，佢一直喺度「修復」緊一啲嘢，咁究竟係乜呢？薯片叔秉承一貫作風：大賣關子。
其實薯片條片都相當之有意境，短短30秒嘅片入面，薯片拎住一塊似係爛咗嘅瓷器（圖），用一支幼嘅木條，將啲黑漆漆、相信係有接合作用嘅物料，搽咗喺嗰塊爛咗嘅瓷器上面，而且佢仲為條片起咗個名叫做「復圓，復元」。簡單嚟講，咪正正係修補撕裂咯！
究竟薯片係咪想修補社會撕裂？佢會點樣修補呢？佢呼籲大家留意住佢fb。而佢位老對手娥特嘅fb，噚日係冇任何更新嘅，大家唔使期待喇。