何君堯（圖）呢排喺北京成日做fb live，好似前晚佢又質疑，百幾萬冇拎回鄉證嘅香港人，係咪實質喺度支持港獨，不過有泛民睇完揄揶佢，何君堯係咪想暗示，北京有份喺民主派入面「製造」港獨？
何君堯喺fb live入面反駁嶺大生聲討佢「殺無赦」言論嘅行動，話自己當日集會入面，只係某嘉賓講完之後，佢「兜兜底」講句嘢，質問唔通咁就犯咗彌天大罪？叫學生睇嘢要睇得全面啲。
之後佢又話，香港有百幾萬人冇申請回鄉證，質問呢啲人咩心態呢？「咪支持港獨囉！」又話大陸發展一日千里，咁都唔去大陸，有金執都唔去執，真係好打極有限！不過有泛民睇完何君堯觀點就笑佢，話佢可能想屈埋民主派入面有人支持港獨，但佢似乎唔記得咗，好多民主派冇回鄉證唔係冇申請，係北京一直唔發，到近來先放鬆，咁何君堯係咪想暗示，北京有份喺民主派入面「製造」港獨？