踏入第10期賽事，唔少馬已上陣兩至三次，甚至有馬季內已勝兩場。部份兵源充足的馬房不急於搶攻，好像告東尼、蔡約翰暫只得一場頭馬，看看踏入第十次賽事會否有更好成績。
雷神莫雷拉連續三次谷草賽事食白果，今次(5日)看看這位「失蹤人士」可否重現凱旋門，他以最尾第八場「創世紀」最值得重視。
第二場四班1200米，可留意文家良馬房「常山耆寶」，上季跑過三次賽事全部輸五個馬位以上，賽績毫無參考價值。9月中試泥閘表現有起色，出閘迅速跟隨領放馬，入直路潘頓悄騎，「常山耆寶」換腳加速顯示鬥心跑第二，其後再跳三課快功夫，都由潘頓包辦，動態積極，今季騎練合作兩次已有1冠1亞，狀態已起，冷門要防。
第四場四班1200米，「喜進」上季已於谷閘顯露前速，可惜之後流鼻血影響進度。今季復課健康穩定，功夫足夠，試閘一貫慣例有前速一放到底，今次5檔理想，跑谷草高度留意。
最尾第八場二班1800米，「創世紀」上季跑三場田草都能爆一段後勁，以南非馬來講算適應快，有搶口毛病需好韁繩騎師幫手，莫雷拉接手試閘勝出已試準，要重視。
同場105分馬「萬馬飛騰」降班跑二班賽，再用潘明輝減7磅，當然有利，而且本身谷草特佳。上仗無熱身下於1400米遇強敵跑第六，返回谷草高度注視。「包裝騎士」上仗1650米內檔放唔出確有點失望，熱身後返首本1800米，再俾次機會。「慣勝聆聽」上仗初上二班查詢跑法，實力未見盡，1800米輕磅再留意。「勁歌兒」北半球馬上季尾開始適應，外地於級際賽揚威能力毋須懷疑，加眼罩隨時變身。