「有人話阿Rex搵啲對手刷排名，好似上一場對手向井寛史係咪一個渣嘅拳手呢？如果first 3% of the world係渣嘅話，I don't know！」
「神奇小子」曹星如（Rex）將於10月7日主場迎戰前世界拳擊協會（WBA）超蠅量級世界冠軍、日本拳手河野公平，力爭22連勝。雖然Rex嘅打不死精神振奮咗唔少香港人，但一直以嚟亦有聲音批評Rex專揀弱對手刷排名。作為一直同Rex並肩作戰嘅前經理人﹑以及香港拳擊推廣人兼總教練劉志遠（Jay）今次接受蘋果訪問，都把握機會回應指控。
Jay 表示：「BoxRec只不過係義務機構去做呢啲排名，你刷到第一都唔會有一個仙。佢哋（網民）淨係識去google，但係啲排名就分得好亂，佢哋唔知道BoxRec嘅排名，同埋世界組織嘅排名嘅分別。」此外，佢又認為 Rex之所以咁努力去練習比賽，絕對唔係為咗個光環：「一個運動員係咪為咗個光環去爭取勝利？我哋每一場比賽得到嘅喜悅唔係因為勝利，而係喺中間付出過嘅努力。答案唔一定係贏或者輸，而係可以證明到我哋出咗100%嘅力，盡全力去做到一件事。」
回應種種批評，Jay 都難忍激動，但當講到由當初冇乜人睇 Rex比賽蝕錢收場，直到對上一次坐爆8000人， Jay 終於笑番晒，仲由心講出一句「 我哋全部都好proud of 阿Rex！」
記者：植詠珊(Cathy)
剪接﹑編審﹑導演：Roy Leung@天馬座
攝影：廖達燊﹑Kaman