專欄作家陳惜姿噚日喺《明報》寫文，話發現讀緊小五嘅囡囡中文科有篇課文相當可疑。課文題目係〈永遠記住：這一時刻〉，描述2008年四川汶川地震，一個叫「譚千秋」嘅老師點樣捨身救學生。曾經任職傳媒嘅陳惜姿發揮記者精神，上網搵咗好多資料，發現7年前已經有內地傳媒揭發有關「捨身救人」嘅新華社報道疑似造假。啟思出版社一接傳媒查詢就即刻認衰，話下一版書會抽起課文。
陳惜姿上網查證發現「譚千秋」真有其人，佢捨身救人嘅事最先被新華社報道，大讚譚係童話中嘅天使，但兩年後《南方都市報》訪問到一個聲稱「被救」學生，揭發新華社疑造假，《南都》引述個學生話地震嗰陣同老師相差兩米，獲救同老師死亡根本無關。陳惜姿不滿出版社冇好好把關，令學生分唔清課文係史實、抑或小說，遑論了解豆腐渣工程嘅禍害。