變靚啲喎，邊個女士唔想？包括好打得嘅女特首林鄭月娥！娥特噚日主持行政會議前，一如以往喺特首辦大堂見記者答提問，但有別於過往，林鄭個樣望落似乎醒神咗。
影完相即收起
望真啲，原來特首辦條走廊加設咗兩盞大光燈，令娥特所站嘅背景走廊，由平日黑暗一片變得好光猛，而兩盞大光燈放到娥特見完傳媒轉身離開後即刻被收起，似乎係娥特專用噃。
八方向特首辦中人打探過，據聞喺林鄭見傳媒時打燈，係為咗拍出嚟嘅效果好啲。有攝記從專業角度睇，亦覺得打咗燈嘅走廊，的確拍得林鄭靚少少，更有眼利嘅攝記留意到，以往走廊放咗兩棵好高嘅盆栽植物，噚日換成兩盆矮好多嘅植物，令過去拍到特首頭頂生樹嘅情況，再不復見，可以睇到娥特嘅形象工程，真係任何細微位都唔放過。
其實特首辦人員噚日仲好細心，除咗喺咪兜為娥特準備一杯水，亦加多包紙巾畀娥特傍身。
而林鄭晚上則登場撐呂志和獎，前特首曾蔭權亦同太太拖住手出席，全國政協副主席董建華、中聯辦副主任譚鐵牛及多位司局長亦有撐場。林鄭發言時除咗大讚呂志和獎得獎者，當然又提及施政管治，佢話促進社會和諧係佢任內嘅首要任務，根據佢過去3個月觀察，反映佢向正確方向前進，仲預告下周發表嘅首份施政報告，會訂下5年施政目標，保證報告內容會同大家嘅核心價值一樣喎。
李八方