求驗客手記:跑動距離勁過簡迪法比仔好氣王

求驗客手記:跑動距離勁過簡迪
法比仔好氣王

英超衞冕嘅車路士,喺季前將中場主力尼曼查馬迪賣畀曼聯,對唔少車迷嚟講都係個好難理解嘅決定,但對車路士陣中嘅法比加斯,就算係好消息。進行咗七輪英超,除咗第二輪因為停賽缺陣,法比喺其餘六場全部都有上陣,有五次係正選。領隊干地照住,呢位西班牙中場都冇揸流攤,至少係夠晒勤力,根據統計,經過英超七輪比賽後,平均每場跑動距離最多嘅球員,就係法比仔,比佢隊友尼高路簡迪仲要多。

干地欣賞夠拼搏

法比喺14/15球季回歸英超,背負槍手叛徒之名由巴塞隆拿轉投車路士,喺嗰季表現高開低走,雖然幫車路士贏到英超冠軍兼做埋助攻王,但下半季表現認真麻麻,到上季簡迪由李斯特城加盟,法比已經喺車路士冇咗正選位置,到今季馬迪離隊先有轉機。論統計數字,現年30歲嘅法比加斯喺今季成績其實一般,𠵱家只係入一球、零助攻,但干地似乎好欣賞佢夠拼搏肯跑動,平均每場跑動距離高達12.88公里,屬英超之冠(見附表)。雖然車仔今季亦由摩納哥簽入另一名中場泰莫爾巴卡約高,法比依然站得住腳。
至於跑動最多第二位係西布朗嘅前鋒積洛迪古斯,平均12.56公里,到第三位先到法比中場拍檔簡迪,每場跑12.39公里。車路士喺上場英超大戰主場輸畀曼城,𠵱家落後後者呢支榜首球隊六分,但法比加斯就話冇有怕:「一年前呢個時候,我哋落後緊榜首八分,所以現時形勢唔代表啲乜,聯賽冠軍仲有排鬥。」

老將巴利(右)落場不惜氣力,亦係十大最多跑動球員之一。 美聯社 

利萊辛尼速度勝暴龍

跑最多係法比加斯,跑最快又係邊個?可能係曼城嘅21歲德國翼鋒利萊辛尼。據英國《太陽報》報道,周日作客車路士嘅比賽入面,辛尼曾跑出時速35.5公里嘅最高段速。至於經已絕種嘅暴龍,佢嘅最高段速亦只不過係時速33.8公里,甚至棕熊亦都只係時速34.9公里。即係話如果辛尼同棕熊、暴龍賽跑,話唔定可以爆贏對手一段。就咁睇可能誇張咗啲,但辛尼今季嘅表現絕對唔失禮,英超上陣七場已入三球,當中只有三場係正選,效率可以講係相當高。
求驗客