旅發局主辦嘅美酒佳餚巡禮會本月26至29日喺中環海濱活動空間舉行，今年設有約400個美酒及美食攤位，規模與去年相若。旅發局節目及旅遊產品拓展總經理洪忠興話，雖然未曾因為玻璃酒杯引致意外，但大會今年應警方建議，除尊尚名酒區、品味館及貴賓區可用玻璃酒杯品酒，其餘場地都要用膠杯，大會已預備約10萬隻膠杯派發畀入場市民，場內亦設約20個膠杯回收箱。
洪忠興預計，4日展期約有14萬至14.5萬人流，其中旅客約佔1.4萬人，人數與去年相若。今年更新增酒區Robert Parker Wine Advocate及氣泡盛薈，前者由著名酒評家Robert Parker親自揀選評分達90分以上嘅名酒，最平只需3張品酒券，即係60元已可品嚐佳釀。