走的終須走？定係但願能再坐一會？講緊嘅係律政司司長袁國強！人所共知，袁國強留任林鄭新班子，無非係捱義氣搞埋一地兩檢，但有傳袁將會做足5年至任期完結。
網媒「香港01」引述消息指，袁國強上個月應承咗林鄭繼續做落去，指原因一方面係林鄭大力挽留，另一方面係同袁國強唔多夾嘅刑事檢控專員楊家雄都走埋，令袁少咗啲顧慮，而林鄭搵唔到人接袁國強棒都係原因喎。八方都就此消息，問過律政司司長辦公室，發言人只係話：「我們不評論揣測性報道。」
如果袁國強真係留任至任期完結，犧牲都唔細，因為佢重返法律界，連辦公室都搵埋嘅消息已經通晒天，有老友仲戥佢肉痛，因為明年初起租，邊個找數先？𠵱家仲傳佢繼續做落去，唔知搵少幾多真銀呢？