呢日中午茶聚，律師W話佢間律師行雖然唔係大地產商御用律師樓，分唔到一手新樓暢銷、賣唔切嘅好處，但水漲船高，佢地嘅按揭、買賣樓宇服務始終都係有得益嘅，地產部嘅生意係多咗。律師W話：「地產商最多謝梁振英餵佢地食肥雞，我地都有啲豉油汁執到。」
2012年四月，個個驚梁振英呢位測量師，地產專家會以劇烈手段推低樓價，因為佢講過不止一次：「要與地產商碰一碰」吖嘛，左丁山嘅校友地產王仲在校友會午餐會上大聲疾呼：「細單位樓價必跌，以解民困，梁振英有辦法嘅！」眨吓眼梁振英已經玩完，結果竟然係細價樓樓價大升特升，豪宅樓價大升，梁振英之一連串三D辣招係逼市民送錢俾地產商，全部湧去買一手樓，梁振英簡直係地產商財神。
這個故事教訓我地，人的本質好難變，測量師始終靠地產市場發達，基本任務就係為客戶（地產商）搵銀。過去五年，樓價升咗五成以上，上星期五差餉物業估價署發表最新數字，樓價指數連升17個月，指數去到339，17個月來升咗25%；租金指數亦升到183.9，係6個月新高。
梁振英政府採用嘅辣招，行內人如施永青一早話冇用，唔會壓抑到樓價，但政府狡辯話，如冇辣招樓價升得更快。事實證明，施永青不斷買樓，投資態度正確，相反，聽信外資大證券商及本地分析師（如交銀國際）講嘢，就輸足幾條街，呢啲大行一年來不斷唱淡樓市，無視市場趨勢，令人懷疑佢地係憑乜嘢理論與數據嚟做分析嘅。金管局過往兩年不斷採用所謂「逆周期措施」嚟干預按揭市場（如收緊按揭成數，樓按壓力測試，加緊檢查銀行按揭貸款）及不斷出口術（如警告有加息風險），但一切徒然，市民就是不聽。上星期五陳德霖又試驚人唔知，講加息縮表與父母為子女提供首期，居然講到可能會研究為「父母俾首期」狀況，向銀行提供指引！唔係呀，父母為子女提供首期都要出指引？指引唔慌係鼓勵性，一定係向銀行施壓嘅啫，金管局管得咁細微，不如索性明令禁止不准「買樓靠父幹」，青年人買樓一定要純粹靠自己！金管局係唔係急到藥石亂投，最終干預埋父母行為呢？逼年輕人唔鍾意政府，金管局要負上政治責任㗎。