中國女排喺里約奧運奪冠,功臣之一嘅魏秋月周一就同教練團成員袁靈犀喺天津舉行婚禮,現年29歲嘅魏秋月喺朝早仲開直播同粉絲傾偈,問佢哋:「大家覺得我今日靚唔靚呀?」咁班網民就梗係識做,齊齊讚呢位新娘子靚女啦。雖然喺伴娘團中,唔見現役國家隊成員嘅身影,但總教練郎平、惠若琪、張常寧、袁心玥、龔翔宇、曾春蕾等人都有出席婚禮,不過星級主攻手朱婷就缺席。