立法會會期月中開始後，席間又多4張空凳，皆因繼早前被撤銷資格嘅青政梁頌恆同游蕙禎後，再有4名民主派議員被DQ，復會後有唔少手尾跟，包括原屬建測界嘅姚松炎原本加入咗根據《議事規則》第49B（2A）條就譴責周浩鼎議案成立嘅調查委員會，故此小組要搵人替補佢個位。
呢個小組係喺周浩鼎被揭串通梁振英修改立會UGL專責委員會文件後成立，7名委員中5個建制，兩個民主派；公民黨郭榮鏗上次有參選，但有指建制派嫌佢火力太猛，最終寧願支持姚松炎及涂謹申。
立會內務委員會本周五就會討論填補姚松炎嘅席位空缺，八方問過郭榮鏗，佢表明會爭取替補姚松炎，笑稱自己只係普通人，建制派唔使怕咗佢。