民建聯立法會議員蔣麗芸平日畀大家嘅印象，可能係聲大大、硬橋硬馬咁，如果唔係都唔會有「元秋」呢個霸氣外號啦！不過如果因為咁就以為蔣麗芸細細個就係男仔頭，咁就大錯特錯嘞，睇番佢以前啲少女相都幾靚女，現年62歲嘅佢自爆細個讀書嗰陣已經有人追，只不過因為爸爸、即係工業家蔣震都管得好嚴，所以冇得拍拖！
只要睇番元秋十幾歲嗰陣嘅相，就知無講大話，元秋係一眾姊妹中排第二，相入面嘅元秋確實比家姐、細妹都似乎養眼啲，眼大大、鼻高高、面尖尖、嘴細細咁。
另一張相見着住裙仔嘅元秋喺舊時大磡村嘅大觀園農場留影，元秋同八方講，有咁靚嘅裙仔着，多數係農曆新年，佢仲記得當年爸爸有兩位朋友都住喺嗰度，一位就係已故影星喬宏，另一位係港大教授，因為爸爸唔識英文，所以經常請教呢位教授，結果佢哋仲做埋朋友。
睇見元秋細個時咁靚女，咁就梗係八卦吓佢後生嗰時係咪好多觀音兵，有好多男仔追？元秋聽到就大笑，佢話細個時候真係有人追佢㗎，仲要係唔少㖭㗎，不過佢就冇接受呢啲追求者，因為佢爸爸管得佢哋幾姊妹好嚴，講到明一日未讀完書，一日都唔准拍拖，所以元秋只好拒絕晒呢班追求者。
擬飛夏威夷慶結婚廿周年
眾所周知，元秋42歲先結婚，莫非因為呢個原因，所以先至咁遲拍拖？元秋話當然唔係啦，佢以前已經講過，因為後生嗰陣寄情工作，所以先至會遲婚。而今年呢，原來係佢結婚20周年紀念，佢話會同老公梁海明慶祝呢個重要日子，𠵱家計劃緊年底去番當年度蜜月嘅夏威夷旅行，重溫當年新婚嘅美好甜蜜回憶。
李八方
