港足噚日喺晒草灣開操，為下周二主場喺大球場對馬來西亞場亞盃外生死戰做準備，而港隊前日公佈咗最後23名大軍名單，今日就會領取特區護照嘅佐迪、丹尼同列斯奧獲補選入隊，做咗最新入籍兵，佢哋收操後話好期待代表香港出戰，希望幫到港隊。
港足近年有唔少入籍兵，而每次有入籍兵加入都會引起球迷討論，今次都唔例外，唔少球迷懷疑，港足選三件年過34歲嘅西班牙老兵有乜幫助？同時亦剝削咗本地球員嘅機會，不過教練金判坤選得佢哋，當然覺得佢哋幫到手應付對大馬場生死戰。
港足噚日首操即為周四友賽老撾試陣，三件狂牛老兵都係正選，估計好大機會齊齊「地標」，佐迪就話，既然具備代表香港出戰嘅資格，又獲教練選入隊，作為球員要做嘅就係盡力幫港隊爭取最佳成績。
港足喺亞盃外踢咗三場得兩分，餘下三場拎唔到九分都好難入到決賽周，而下周二對馬來西亞更一定要贏，佐迪話：「港隊餘下三場必須有好成績，今場對大馬係硬仗，我都翻睇咗香港作客大馬場波兩次，對手實力係勁，但港隊都有質素，有信心可以喺主場全取三分，甚至喺黎巴嫩同北韓身上都可以交到貨。」
列斯奧就話已經百分之二百準備好為港隊出戰，而可以代表香港出戰國際賽，簡直係夢想成真，丹尼都表示話可以代表香港，係一件好值得高興嘅事。
