屋企若然有個大內總管幫手，自然輕鬆好多。八方報道過，政府日前出咗招聘廣告，政務司司長辦公室以月薪28,000蚊請「總管事」，主要提供家居服務，如清潔打掃、宴會烹調同洗燙等，呢個係非公務員合約位，為期一年。
但呢個職位空缺寫明嘅部門雖則係政務司司長公室，但要請人嘅卻係財政司司長陳茂波，點解財爺要請大內總管，要由政務司司長代勞？政務司司長辦公室解釋，原來財爺辦轄下冇行政部門負責聘請工作，所以要由屬於政務司司長辦公室嘅行政署代勞，所以呢次係波叔而非張建宗要請人。
波叔嘅財爺官邸啱啱花咗80幾萬元裝修，相信獲聘做呢位總管事嘅人，屆時可以喺唔錯嘅環境下工作。