今季睇英超默西塞德郡雙雄真係唔使驚冇波入，呢對默郡難兄難弟喺周日英超齊齊失分。利物浦後防又出事，作客紐卡素今次由一對中堅祖爾麥迪比同埋洛夫雲夾份送禮，結果被逼和1:1，領隊高路普就話球證漏判12碼；愛華頓仲慘，主場0:1輸畀般尼，領隊朗奴高文已經聞到魷魚香。
中堅送禮俾紐記逼和
紅軍作客由前主帥賓尼迪斯領軍嘅紐卡素，喺29分鐘由菲臘比古天奴射入世界波先開紀錄，但到36分鐘就被扳平，倒戈嘅舒維爾直線妙傳，紅軍一對中堅祖爾麥迪比同洛夫雲兩個睇唔住一個，任由主隊前鋒祖斯盧辛馬田單刀殺入禁區，麥迪比想從後鏟走個波，反而撞到祖斯盧右腳後再入網，洛夫雲就一早收步唔追波，利迷睇到咁有乜法子唔心灰。
領隊高路普賽後繼續力撐後防線，不單冇責怪洛夫雲防守不力，反而仲替愛將感到不值︰「我哋有一個明顯12碼，我唔知耶迪連要做乜嘢，係咪想除咗洛夫雲件衫？」高路普近期賽後感言都係差唔多，不外乎話有好多機會但就係入唔到，失分得好唔抵︰「我哋入咗球靚波，製造咗好多出色嘅機會，通常我哋會入到一球呢啲波。我見唔到紐卡素有更多機會，佢哋得一次機會就入咗，感覺唔係好公平。」呢啲說話，咁似阿仙奴嘅雲格喺低潮時候講嗰啲嘅？不過人哋啱啱過咗執教兵工廠21周年大日子，隊波仲順到不得了，周日主場2:0贏白禮頓，近七場六勝一和。
另一支默郡球隊愛華頓，周日主場對般尼，主帥朗奴高文將朗尼貶為後備，形勢佔優但入唔到波，結果被對方中場軒迪克一箭定江山，以0:1落敗，開出足智彩的5.6倍冷W。愛華頓喺上月艱苦反勝般尼茅夫重回勝軌，今場又輸番波之後，近五場英超輸四場。
戰績不似預期，朗奴高文帥位已經岌岌可危。佢亦被外國博彩公司列為1.33倍下位英超離隊領隊大熱，拋離次熱5.5倍嘅比歷。至於接任人選，上星期拜仁炒嘅安察洛堤以七倍成為大熱，次熱係曾經效力過愛華頓嘅安斯禾夫，九倍。
